Ciodo original in vera pele, nero, con sbrindoli drio la schena tra spala e spala, con teschio disegnà là del cuor, ex bobaza de viale vendi a mulo giovane che volessi ciapar la qualifica de nagana.
Vecio imbriagòn vendi zavate, capel de paia e vestalia de portar a pindolòn, a seguito de dismission da l’otava division de San Giovani.
Vestitini per fioluza, tuto color rosa, braghe e braghete, cotole e cotolete, tutine, bavarioi, mudandine, calzete e papuzete ricamade a man vendo causa sbalio de ecografia.
Belissimo vestitin bianco per la cresima, con un bel velo bianco longo, fiocheto panna, cotola longa e lustra, mai usado, vendo perché sta sempia de mia fia ghe ga verto la porta ai testimoni de geova.
Te vol vestirte de baba el prossimo carneval? Go quel che fa per ti! Vendo vestito de carneval de baba, completo de scarpe numero 45 de pele de bissa con taco alto, calze a rede maia larga o, in alternativa collant neri 90 denari con paiet e lustrini, cotola rossa con spaco fin drio le culate e ghepier rossa in tinta, corpeto nero in pizo trasparente con sbrindoli de seda e brilantini su le cusidure, tete finte in plastica nona misura, giacheta leopardada maniga longa curta in vita con colo de pel de gato morto, paruca bionda coi rizi e velo nero.
Ideale anche per chi ga un’atività extra lavorativa in zona stazion o Cavana in quel caso posso zontar anca un frustin e un per de manete de pulioto.
Anfibi neri con borchie de fero, numero 46, punta rinforzada, taco concavo per sconder picoli strafanici, alti fin soto el zenocio, gloriosamente usadi per le trasferte a Vicenza, Padova e Udine e per i vitoriosi assalti ai pulman dei suporter spezini e livornesi, ultras de l’Unione vendi a giovane aspirante frequentador de stadi.
Magnifiche scarpe anti-infortunistiche, model grampa-e-scampa, resistenti ai urti e praticamente impenetrabili da la piova, otime per lavori de carpenteria, fachinagio, carigo-scarigo, falegnameria e ideali per el tempo libero sopratuto per chi ga la passion de andar a ingrumar castagne, sparisi o funghi pei boschi. Come nove, numero 42 slambriciado che pol andar ben anche per un 44, siole pena fate de Piero el caligher de via de la Zonta.In omagio un per de calzini de spugna usadi poco.
Vestito de sposa, novo mai doprado, con tul e strass, pizzi e lazzi, spaline con perline, misura 44 completo de combinè e cercio per i cavei, se po ve ciamè Ucia e el vostro sposo Nando go anche do bele vere de ocasion.
Capoti, traverse, cotole, maie, maioni, camise, mudande, canotiere, barete e scufioti, vendo causa cambio taglia. Telefonare a Nadia la s’gionfa.
Scarpe de baba leopardade, con punta e taco alto, eleganti ma sportive, tipo stivaleto alto fin meza coscia abinabile con ghepier rossa, vendo causa cessazione attività. Ugo.
Naso rosso tondo de paiazo con fis’ceto incorporado abinabile a finto fior che schiza acqua de meter sul taschin de la camisa, ideale per serate in alegria tra amici sopratuto se se ga fioi. Se interessadi go anche el balon che messo sula carega co un se senta fa el rumor de la scoreza.